LAOAG CITY – Inpakaammo ni F/Supt. Roxanne Parado, Provincial Fire Marshal ti Bureau of Fire Protection ditoy Ilocos Norte a mai-block ti numero dagiti agar-aramid ti prank call ken dropped call iti Regional Satellite Command Center for 911 Emergency Response System iti Batac City Fire Station ditoy probinsia.
Segun kenkuana, adda ti naiget a pagannurotan iti panagawat kadagiti tawag no sadinno a no saan nga agsusurot dagiti basic information a kasapulan ket maikonsiderar dagitoy a prank call.
Inbatadna a ti numero ti nag-prank call iti namitlo a daras ket otomatiko a mai-block tapno saanen a makatawag dagitoy.
Inlawlawagna nga idi dati ket centralized dagiti tawag a maaw-awat ngem itan ket sumrek iti Regional Satellite Command Center a maiturong kadagiti maseknan nga area of responsibility.
Kunana a dagiti maaw-awat a tawag ti Batac City Fire Station ket manipud iti intero a rehion uno a bukbuklen ti Ilocos Norte, Ilocos Sur, La Union ken Pangasinan.
Inpasingkedna a babaen iti daytoy ket ad-adda nga al-alisto ti panagresponde dagiti otoridad kadagiti agkasapulan ti tulong.
Innayonna a malaksid iti siudad ti Batac ket adda pay ti naiyestablisar a Regional Satellite Command Center for 911 Emergency Response System iti Cauayan City, Iloilo City ken Leganes.
Immuna iti daytoy, pormalen a nangrugi ti operasion ti Regional Satellite Command Center for 911 Emergency Response System iti Batac City Fire Station.
