Kinumpirmaran ti Philippine National Police (PNP) Sarrat Police Station, nga iligal a droga ti nabirokan iti maysa a pribado a kamposanto iti Brgy. 18 San Isidro iti ili ti Sarrat.
Daytoy ket kalpasan a dimmalan ti iligal a droga ti laboratory examination.
Basar iti PNP-Sarrat, manarimaan ti panang-review da kadagiti nagduduma a CCTV footage kadagiti posible a nagdalanan ti suspek.
Nakita da nga adda maysa nga indibidual a nakasakay iti motorsiklo nga agsubsubli iti dalan nga agturong iti nasao a kamposanto iti malem wenno rabii ti oras a napasamak ti insidente.
Innayonda a saan pay a masinunuo ti eksakto a detalye ti nasao a motorsiklo a nagluganan ti maipagarup a suspek gapu ta saan a nalawag wenno saan unay a malasin CCTV footage.
Mainaig iti daytoy, naamoan nga awan ti CCTV a nakaimuntar iti paset ti pribado a kamposanto.
Maipalagip a nabirokan ti iligal a droga iti mismo a sango ti kamposanto kabayatan ti panagdalos dagiti opisyal ti barangay ti nasao a lugar.
Dagitoy ket nakasupot ken napandagan ti bato a dinakamat ti PNP-Sarrat a maibilang a dead drop, maysa a transaksion no sadinno saan a personal nga agkita ti seller ken buyer ti droga.
Iti agdama, agtultuloy ti imbestigasion ti Sarrat PNP-Sarrat tapno maamoan no siasinno dagiti responsable iti insidente.
