LAOAG CITY – Posible nga agkiddaw ti maipagarup nga ni Acting Senate President Sherwin Gatchalian ti special Senate session ken ni Presidente Ferdinand Marcos Jr., para kadagiti naitantan a legislative agenda gapu kadagiti agsasaruno a panagsukat ti liderato iti Senado iti napalabas a lawas.
Segun ken ni Gatchalian, agdama a liplippasenda dagiti listaan dagiti linteg ken appointment nga saan a naasikaso no maaprobaran ti special session ti Palasyo.
Karaman iti matutokan ti pannakakumpirma ti sumagmamano nga opisial ti Armed Forces of the Philippines (AFP), partikular ti lima a heneral a mabalin a makaapektar iti pannakaitantan ti deliberasion ti Commission on Appointments (CA).
Impaganetget ti agdama a Senate President a saan laeng administrative delay nu di et ti aktual nga epektona iti operasion ti gobierno, nangruna kadagiti nakauniporme a personnel nga agur-uray iti pannakakumpirma ti promosion.
Iti sidong ti agdama a sitwasion, saan pay a naan-anay a nabukel ti Commission on Appointments (CA) ken sumagmamano a komite ti Senado, daytoy ket kageddan ti kalpasan ti sumagmamano a panagbalbaliw iti liderato ti Senado manipud Mayo agingga iti Hunio.
Gapu iti daytoy, dumakdakkel ti panawagan iti uneg ti sumagmamano a sektor ti Senado a mangusar iti bileg ti Presidente a mangawag iti special session tapno maituloy ti naitantan a trabaho ti lehislatura.
Segun ken ni Malacañang, silulukat ti Presidente iti kastoy nga addang no adda pormal a kiddaw manipud iti Senado ken nalawag a listaan ti urgent nga agenda.
