LAOAG CITY – Rinugianen ti City Engineering Office ti panagdalus kadagiti kanal ken pagayusan ti danum iti nagduduma a paset ti siudad ti Laoag kas panagsagana ita a panawen ti tudtudo.
Daytoy ti inpakaammo ni Engr. Marishel Batuac, ti mangidadaulo iti City Engineering Office ditoy ciudad ti Laoag.
Inbatad na a napateg ti nasao nga addang tapno maliklikan iti pannakalayos dagiti nagduduma a paset ti ciudad.
Mainaig iti daytoy, kiniddaw ni Batuac ti kooperasion dagiti amin nga umili iti panangpatalinaed ti kinadalus ti aglawlaw babaen iti umno a panagibelleng ti basura tapno saan a mapan kadagiti kanal a magitunda ti panagbarado da.
Innayon na a babaen iti naiget a panagtitinnulong ket masigurado ti kinatalged iti tunggal maysa ita a panawen ti panagtutudo.
