LAOAG CITY – Inbutaktak ni House impeachment prosecutor ken Bicol Saro Party-list Rep. Terry Ridon a saan a nababbaba ngem 50 a paltog ti maipagarop a nakarehistro iti nagan ni Vice President Sara Duterte ken ti asawa na a ni Manases “Mans” Carpio, a mabalin a mangpangato iti aktuwal a net worth da no ikumpara iti nailanad kadagiti Statement of Assets, Liabilities and Net Worth (SALN) ti Bise Presidente.
Segun ken ni Ridon, kiddawen ti prosecution panel iti Philippine National Police (PNP) dagiti rekord ti agtagikua kadagiti paltog ken mabalin a paawagan dagiti firearms dealer ken valuation expert iti impeachment trial tapno maamoan ti balor amin dagitoy.
Inpetteng ni Ridon a masapol a naideklarar iti Statement of Assets, Liabilities and Net Worth da Vice President Duterte dagiti paltog gapu ta karaman dagitoy kadagiti rehistrado a personal a sanikua a kasapulan a saggaysaen nga ilista dagiti opisyal ti gobierno.
Inbatad ni Ridon a dagiti nasao nga armas ket bukbuklen dagiti maipagarop a rifle, revolver, shotgun, ken pistol a nakainaigan kadagiti Duterte-Carpio.
Innayon na a possible nga umabot iti minilyon a pisos ti pakabuklan a balor dagitoy.
Paset ti isyu dagiti paltog dagiti ebidensya nga inpila ti prosecution iti impeachment case kontra iti Bise Presidente.
Naikeddeng a mangrugi ti trial intono Hulyo 6, 2026.
