LAOAG CITY – Inpetteng ni House Speaker Faustino “Bojie” Dy III a direkta a mairanud dagiti Pilipino kadagiti prayoridad a gakat a matratar iti espesyal a sesyon ti Kongreso.
Karaman kadagiti gakat ket ti pannakaipalawa ti tulong iti edukasyon, naur-urnus a serbisyo ti salun-at para kadagiti senior citizen, ken tulong para kadagiti pamilya a nagpasar ti krisis.
Segun ken ni Dy, gagem dagiti nasao a gakat nga ad-adda a maiyasideg ti serbisyo ti gobierno kadagiti agkasapulan, aglalo kadagiti estudyante, senior citizen, ken marigrigat a pamilya.
Inpanakkel met nga inulit ni Speaker Dy a naaprubaranen ti kamara de representantes dagiti nasao a gakat ken mangnamnama da a dagus a mapagbalin a naan-anay a linteg tapno pakairanudan ti ad-ado a Pilipino.
Immuna iti daytoy, nagpaawag ti special session ni Presidente Ferdinand Marcos iti Senado tapno solusyonan dagiti priority bills ti administrasyon a naikeddeng a maiyuswat intono bigat, Hunyo 17,2026.
