LAOAG CITY – Inpetteng ni Ombudsman Jesus Crispin Remulla iti panagbitlana iti 7th Global Conference on Sustainable Development Goal 16 iti United Nations Headquarters idiay New York City a nasken a saan a malpas iti imbestigasion iti flood control ken dadduma pay nga infrastructure projects ti gobierno iti panagpasungbat kadagiti indibidual a karaman iti anomalya.
Inbatadna a masapul nga agresulta ti reporma kadagiti institusion ti gobierno ken tingitingen ti naun-uneg a pagkapsutan iti sistema nga agbalbalin a rangtay iti anomalya.
Malaksid iti daytoy, inrakurak pay ni Remulla a dagiti nasao a karit ket maysa kadagiti gundaway ti gobierno tapno maikorehir ti panagkurkurang iti sistema.
Kagiddan daytoy, inpasigurado ni Remulla nga agtalinaed a natibker ti Office of the Ombudsman iti panagpasungbat kadagiti opisial a mangab-abuso iti bilegda maiyataday iti pammilin ti Konstitusion.
