LAOAG CITY – Manarimaan ti pannakatarimaan dagiti heavy equipment iti lokal a gobierno iti ili ti Badoc.
Segun ken ni Mayor Virgilio Calajate, agsagsaganada para iti daytoy panagtutudo nangruna ket adu dagiti dalan iti barangay nga agkasapulan ti gravel and sand a nasken a pakausaran dagitoy a ramit.
Inbatadna a saanda a gumatang ti baro gapu ta masayangan kadagiti dati nga equipment a dagitoy ket nabiit pay a nagatang ngem saan a namentenar isu nga idi nagtugaw daytoy kas Local Chief Executive ket dagitoy dagiti immuna a kinitana.
Inlawlawagna a sayang laeng no gumatang manen ti sabali nangruna no mayat met pay dagiti dati ken masapul laeng a matarimaan ken agtultuloy a mamentenar.
Mangnamnama a mapagbalin amin dagitoy gapu ta kasapulan ti ili tapno ad-adda pay a napinpintas ti maipaay a serbisio iti publiko.
Naammoan a dudua ti garbage compactor iti nasao nga ili ket maysa ti basura kadagiti kangrunaan a pakaseknan dagiti umili ken dagiti machineries iti pagbasuraan ket nadadael.
