LAOAG CITY – Inbatad ni senador Panfilo “Ping” Lacson a saan a nababbaba ngem P700 a milyon a pisos a kwarta ti umili ti nasayang iti uneg ti 28 nga aldaw nga indaulwan ni dati a Senate President Alan Peter Cayetano ti Senado.
Segun ken ni Lacson, karaman kadagiti kalideman a napasamak iti nasao a panawen ket ti pammaltog iti uneg ti senado, dua nga aldaw kalpasan a nagbalin a Senate President ni Cayetano, ken ti panaglibas ni Sen. Ronald dela Rosa kabayatan nga adda iti “protective custody” ti Senado.
Naimatangan pay iti uneg ti 28 nga aldaw ti panag-boycott kadagiti sesyon ti agdama a minority bloc nga idadaulwan ni Cayetano, kasta pay ti napaay a gandat a destabilisasyon ken bogus a panagdengngeg ti komite, karaman ti maysa a panagdengngeg nga uray maysa a senador ket awan ti nagatendar.
Immunan nga inbatad ni Senate President Sherwin Gatchalian a makagasgastos ti Senado ti sumuruk-kumurang a P25 milyon ti kada aldaw no maisardeng dagiti sesyon ken awan ti maar-aramid a plenary work.
Iti baet daytoy, inrakurak ni Lacson ti namnama iti baro a panangrugi iti babaen ti liderato ni Gatchalian kas Senate President, kasta pay ti dadduma nga opisyal ti Senado ken dagiti mangidaulo kadagiti komite iti naisayangkat nga special session idi Miyerkules, Hunyo 17.
