LAOAG CITY – Inpasigurado ni Presidente Ferdinand Marcos Jr. nga agtultuloy ti rehabilitasion ken panangipasdek kadagiti imprastraktura tapno makissayan ti pannakadadael gapu iti panaglayos ken dadduma pay a kalamidad iti pagilian.
Iti inspeksion iti rehabilitasion ti Mananga River idiay Talisay City, Cebu, kuna ti Presidente a gagem ti gobierno a maliklikan ti kanayon a panaglayos ken pannakadadael dagiti sanikua a napasaran kadagiti naglabas a bagyo.
Kuna ni Marcos a saan laeng a panagtarimaan kadagiti nadadael nga istruktura ti ar-aramiden ti gobierno no diket pakairamanan ti panangipatungpal ti long term solution tapno makontrol ti taray ti danum ken makissayan ti riso ti panaglayos.
Inlawlawagna a nailatangen iti 2027 national budget ti pundo para kadagiti proyekto a rehabilitasion ken flood control tapno masigurado nga agtultuloy dagitoy.
Karama kadagiti addang nga ipatpatungpal ti gobierno ti panangpapigsa ti flood control structure, panangipasdek ti drainage systems, panangipatungpal ti no-build zones ken panangiyakar kadagiti residente nga adda kadagiti lugar a narisgo iti layos.
Dinakamat pay ni Marcos dagiti nakaplano a dam projects idiay Cebu kas paset ti nalawlawa a programa tapno makissayan ti panaglayos manipud kadagiti nalalawa a karayan iti probinsia.
