LAOAG CITY – Inpetteng ni House prosecutor at Bicol Saro Rep. Terry Ridon a masapol nga imbestigaren a naimbag ti naireport nga P88.5 milyon a net worth ni Vice President Sara Duterte idi 2024 manipod pay idi 2007, iti panangrugi na a ti nagserbi iti publiko.
Segun ken ni Ridon, saan nga umdas a kitaen laeng dagiti rekord manipod 2022 gapu ta napateg a masubaybayan ti pakabuklan a napastrek, sanikua ken dagiti utang a nakailanad iti Statements of Assets, Liabilities and Net Worth (SALN) ti bise presidente manipod 2007 agingga iti 2024.
Kuna pay ni Ridon a napateg dagiti rekord manipod iti Bureau of Internal Revenue (BIR), Anti-Money Laundering Council (AMLC), ken dagiti bank account tapno maikumpara kadagiti Statements of Assets, Liabilities and Net Worth ni Duterte ken maestablisar no adda dagiti sanikua a saan a naideklarar.
Inpetteng ni Ridon nga usaren ti prosekusyon dagiti dokumento kas ebidensya iti impeachment trial ken addaan iti Senate impeachment court ti desisyon no kasanu na nga ikkan ti importansya daytoy.
