LAOAG CITY – Nagpalagip ni Vice Mayor Maribel Albano iti ili ti Vintar iti publiko mainaig iti dengue.
Segun kenkuana, naiget ti koordinasion ti lokal a gobierno kadagiti barangay ken pagadalan tapno maipakaammo kadagiti umili dagiti nasken nga aramidenda tapno maliklikan a makagat ti lamok nga addaan ti sakit a dengue aglalo ita a panawen ti panagtutudo.
Inbatadna a masapul a dadaelen wenno ikkaten dagiti mabalin a pagbalayan ken pagitlogan dagiti lamok a mangitunda ti risgo iti salun-at dagiti residente.
Inlawlawagna a bimmisitada pay ti sumagmamano a pagadalan iti ili ti Vintar no sadinno nga awan met ti nakitada a mabalin a paggapoan dagiti lamok.
Mainaig iti daytoy, inpasingked ni Vice Mayor Albano nga adda ti umdas nga agas ken natalged a pasilidad para kadagiti pasiente a nakaptan ti sakit a dengue.
Innayonna a posible latta a makaptan ti maysa nga indibidual ti nasao a sakit uray napasaranna daytoyen kadagiti napalabas a panawen.
