LAOAG CITY – Umaboten iti 920 nga indibidual ti kumpirmado a natay iti nagsaruno a magnitude 7.2 ken 7.5 a gingined a nangdayyeg idiay Venezuela basar kadagiti opisial.
Adda ti sumurok 3,300 a tattao ti nasugatan idinto nga agtultuloy ti panagbirbirok iti rinibribu a mapukpukaw kadagiti lugar a nakaro a naapektaran ti didigra.
Maipalagip a dinayyeg ti magnitude 7.2 ken 7.5 a gingined ti pagilian idi Mierkoles a napasamak nga awan pay ti maysa a minuto iti nagbaetanna.
Manipud iti immuna a bilang a 589, agtultuloy a ngumatngato ti death toll idinto nga agtultuloy ti panagbirbirok kadagiti biktima a posible a naipit kadagiti narpuog a pasdek.
Basar iti United Nations, sumurok 50,000 a tattao ti mapukpukaw kalpasan ti napigsa a gingined.
Agtultuloy ti iwaywayat a search and rescue operations dagiti bumbero, suldado ken dagiti volunteers kadagiti lugar a nakaro a naapektaran partikular iti estado ti La Guaira.
Karaman kadagiti kakaroan a nadadael ti sumurok 250 a pasdek, walo nga ospital, pasdek ti Venezuelan Red Cross pakairamanan ti embahada ti France.
Naruay a residente ti napukawan ti pagtaengan ken napilitan a naturog kadagiti kalsada kalpasan a narpuog wenno indeklarar a saan a natalged dagiti pagtaenganda.
