LAOAG CITY – Saan a bumaba iti innem nga indibidual ti natay idinto a sumurok 30 met ti nasugatan kalpasan a timmama ti dua a gingined iti kabanbantayan a paset ti Peru.
Basar iti National Seismological Center ti Peru, nairekord ti magnitude 5.1 ken magnitude 3.7 a gingined iti probinsia ti Chupaca iti Junín region, sumurok-kumurang 300 a kilometro iti daya ti kabisera a Lima, Peru.
Inbatad ti ahensia a ti umuna a gingined ket nairekord nga adda ti kauneg a 24 a kilometro idinto ti maikadua a gingined ket adda ti kauneg a 18 a kilometro.
Immunan nga inrakurak ti European-Mediterranean Seismological Centre nga adda ti kapigsa a magnitude 5.6 ti umuna a panagdayyeg.
Basar iti report, umabot iti 48 a pagtaengan ti naminpinsan a nadadael idinto a 18 pay ti nadadael a nakaapektar iti mapatta-patta a 300 a residente.
Manarimaan a maipapaayan dagitoy ti tent kas temporario a pagtarusanda.
Kaadoan kadagiti naapektaran ti komunidad iti Chupaca ket naaramid iti adobe blocks nga alisto a madadael no adda ti napigsa a gingined.
Agtultuloy ti panagbirbirok kadagiti posible a na-trap iti babaen kadagiti debris.
Naammoan a kas ti Pilipinas ket maysa ti Peru a masarakan iti Pacific Ring of Fire, maysa a rehion no sadinno a mapaspasamak ti sumurok-kumurang 85 a porsiento ti amin a gingined iti lubong.
