LAOAG CITY – Agturong ni Presidente Ferdinand Marcos Jr. idiay Canada manipud Hulio 1 agingga 4 kagiddan ti panangimbitar ni Canadian Prime Minister Mark Carney.
Kangrunaan a gagem ti official visit a palawaen ti negosio, panagpuunan ken kooperasion ti Pilipinas ken Canada iti depensa, seguridad, enerhia, artificial intelligence (AI) ken dadduma pay a napapateg nga industria.
Makitaripnong ti Presidente ken ni Carney tapno talantanen ti panangpaiget ti relasion ti dua a pagilian ken dagiti isyu pangrehion pakairamanan ti Indo-Pacific ken ti ASEAN Chairmanship ti Pilipinas.
Makipagkita pay ni Marcos kadagiti negosiante tapno makaallukoy ti panagpuunan ken negosio iti pagilian.
Kadua ti Presidente ni First Lady Liza Araneta-Marcos iti pannakitaripnong iti Filipino community iti Vancouver kas pammigbig ti tulong dagiti Pilipino iti natibker a relasion ti Pilipinas ken Canada.
Daytoy ti umuna nga official visit ti maysa a Presidente ti Pilipinas iti Canada iti uneg ti sumurok maysa a dekada.
Naudi a bimmisita idiay Canada ni dati a Presidente Benigno Aquino III idi 2015.
