LAOAG CITY – Inadmitir ti World Health Organization (WHO) a marigatanda iti panangsolbar ti Ebola outbreak idiay Democratic Republic of Congo ken Uganda.
Inbatad ni World Health Organization chief Tedros Adhanom Ghebreyesus a nababa ti risgo iti sangalubongan manipud iti Ebola outbreak ngem nagpanawagan isuna a paigetan pay dagiti addang tapno lappedan ti panagwaras ti naidumduma a Bundibugyo strain ti virus.
Inlawlawagna a saan nga umdas ti contact-tracing, kurang ti kapasidad iti panangtaming ken nagtalinaed a dakkel a karit ti natalged a panangitabon kabayatan nga adda iti babaen ti pressure ti health system.
Ti epicenter ti Ebola outbreak ket adda idiay Congo no sadinno a nairekord ti 1,094 a confirmed cases pakairamanan ti 277 a pannakatay.
