LAOAG CITY – Umanamong ni Rev. Father Arvin Mangrubang ti Iglesia Filipina Independiente iti nagbalin a takder ni Mayor Cresente Garcia mainaig iti pannakaipasdek ti offshore wind farm iti ili ti Burgos.
Segun kenkuana, marikna ti grupoda a Saluadan ti panangisakit ni Mayor Garcia kadagiti umili ken ti kabaybayan kas maysa a lider.
Inbatadna a napintas ti addang ti Mayor gapu ta kalikagumna a maprotehiran ti kinabaknang ti baybay ken ti panagkalap dagiti mangngalap nga isu ti kangrunaan a pagsapulan ti kaadoan a residente iti lugar.
Inlawlawagna a nangipasa ti grupoda ti petision maipanggep iti daytoy a banag iti Provincial Government of Ilocos Norte ngem awan pay ti sungbatda agpapan kadagitoy a gundaway.
Nupay kasta, kunana nga uray saan nga ikankano ti gobierno probinsial ti gagemda ket agtultuloy latta ti panangilawlawagda kadagiti tattao iti epekto ti pannakaipasdek ti offshore wind farm.
Innayonna a naidanon pay daytoy nga arungaing iti international media aglalo iti epektona kadagiti residente ken mangngalap.
Immuna iti daytoy, saan nga umanamong ni Mayor Garcia iti pannakaipasdek ti offshore wind farm iti ili ti Burgos gapu ta naruay a residente ken mangngalap ti maapektaran.
