LAOAG CITY – Mapadayawan ti sumagmamano a barangay ditoy siudad ti Laoag kagiddan iti Ilocos Norte Award for Barangay Excellence in Legislation wenno INABEL Awards.
Segun ken ni Ms. Chariz Garma, mangidadaulo ti Department of the Interior and Local Government ditoy siudad ti Laoag, matingiting dagiti barangay iti panangputarda kadagiti ordinansa ken resolusion pakairamanan ti panagpatarayda iti konseho.
Inbatadna a babaen iti daytoy ket mabigbig dagiti ar-aramidenda iti Sangguniang Barangay.
Kunana a daytoyen ti maikadua a tawen a maisayangkat iti nasao a programa no sadinno a kitkitaenda dagiti mabalin pay nga improvements iti daytoy.
Inlawlawagna a mangrugi ti pannakatingiting dagiti barangay ita a bulan ti Hulio a malpas inton Agosto wenno Setiembre.
Innayonna a gutgutigotenna dagiti amin a barangay a makipaset iti nasao a programa.
