LAOAG CITY – Kalikagum ni Liga ng mga Barangay President Ryan John Pascua a mangputar ti ordinansa para iti tinawen a pannakaisayangkat ti Ilocos Norte Award for Barangay Excellence in Legislation wenno INABEL Awards ditoy probinsia.
Segun kenkuana, daytoy ket kalpasan a naobserbaranna a naruay pay laeng dagiti barangay ditoy probinsia ti saan a sumursurot kadagiti umno a pagannurotan iti konseho iti barangay.
Inbatadna a masapul a ti ar-aramiden ti maysa nga opisial ti barangay ket maiyarngi met laeng kadagiti Sangguniang Panlungsod Members, Sangguniang Bayan Members ken Sangguniang Panlalawigan Members.
Inlawlawagna nga umabot iti 60 a porsiento manipud iti 559 a barangay iti intero a probinsia ti sumursuroten iti parliamentary procedures tapno saan laeng a mangiwayatda ti regular session no diket maobligar dagitoy a mangputar ti resolusion a maipasa iti umuna wenno agingga maikatlo ken maudi a pannakaibasana.
Innayonna nga adda ti maiyuswat a taripnong kaduana ti Department of the Interior and Local Government, Office of the Barangay Affairs ken Local Finance Committee maipanggep iti nasao a banag.
