LAOAG CITY – Nangirakurak ti suporta ti kadakkelan a network ti microfinance institutions iti pagilian ken ni Senador Bam Aquino mainaig iti panagsublina daytoy kas chairperson ti Senate Committee on Trade, Commerce, and Entrepreneurship.
Inbatad ti Microfinance Council of the Philippines, Inc. (MCPI) a siraragsakda a makibinnulig ken ni Aquino iti pannakaipatungpal kadagiti polisia a mangpalawa kadagiti oportunidad iti ekonomia ken mangpapigsa iti pagsapulan dagiti babassit a negosiante.
Innayonda pay a ti panagsubli ni Aquino iti komite ket napintas a pasamak para iti sektor a mangmangted ti serbisio babaen ti panagited ti pinansial a tulong ken panagpalawa ti negosio iti minilyon a Pilipino nga addaan ti nababa laeng a ganansia.
Inpanagetget ti nadakamat nga ahensia dagiti inpatpatungpal ni Aquino a gakat kas ti Go Negosyo Act ken Microfinance NGOs Act a segun kenkuada, nakatulong daytoy iti pannakaaramid kadagiti ganuat para kadagiti microentrepreneur ken dagiti dagduduma nga organisasion a mangsupsuporta kenkuada.
Ti Microfinance Council of the Philippines, Inc. (MCPI) ket ti kadakkelan a network microfinance institutions ditoy pagilian nga addaan ti kabinnulig a 59 nga institusion, karaman dagitoy dagiti 50 a regular a miembro ken siam a support institutions, a mangibagbagi iti maipagarup 80 agingga 90 a porsiento ti aktibo nga outreach sektor ti microfinance iti pagilian.
