LAOAG CITY – Inrakurak ti international organization for independent tanker owners a dakkel ti nagbabaan ti bilang dagiti barko a dumaldalyasat iti Strait of Hormuz gapu iti kumarkaro a tension iti rehion.
Manipud iti masansan a sumurok-kumurang 130 a barko iti kada aldaw sakbay a nangrugi ti riribok iti rehion, adda laengen iti maymaysa a digit ti bilang dagiti barko nga agus-usar ti ruta tapno dumalyasat iti daytoy.
Daytoy ket kalpasan ti panagsinnukat manen dagiti airstrike ti Estados Unidos ken Iran idi Mierkoles ken Huebes.
Basar iti militar ti Estados Unidos, tinamaan ti airstrike-da ti agarup 90 a target ti militar iti Iran pakairamanan ti sumagmamano a pasilidad nga asideg iti Strait of Hormuz.
Gagem a pakapsuten ti kabaelan ti Iran a raoten dagiti commercial a barko ken sibilian a dumaldalyasat iti nasao nga Strait.
Kinumpirmaran ti Iran a saan a bumaba iti 14 nga indibidual ti natay iti kaudian a panangatake ti Amerika.
