LAOAG CITY – Agsagsaganan ti Taiwan, China ken Japan iti iduduprak ti Bagyo Inday nga addaan ti international name a Bavi a manamnama a mangitunda ti panagtudo ken napigsa nga angin iti rehion.
Basar iti weather authorities ti Taiwan, posible a mangitunda ti bagyo ti agingga maysa a metro ti tudo iti sumagmamano a lugar.
Adda ti sumurok 29,000 a suldado ti nakabantay tapno tumulong kadagiti posible a rescue ken relief operations.
Manamnama a daytoy ti dakkel a bagyo a dumuprak idiay Taiwan basar iti kalawa daytoy sipud idi 1987.
Mainaig iti daytoy, nagballaag dagiti otoridad idiay China a mabalin a maaddaan ti dakkel nga epekto ti Bagyo Bavi no dumuprak daytoy iti probinsia ti Fujian.
Agsagsagana metten dagiti residente iti abagatan ti Japan pakairamanan ti Sakishima Islands iti posible a pagturongan ti bagyo.
Kabayatanna, kinanselar ti sumagmamano nga airlines ti ginasgasut a biahe gapu iti dakes a panawen pakairamanan ti Japan Airlines, All Nippon Airways, Thai Airways ken Malaysia Airlines a nakaapektar iti rinibribu a pasahero.
Agtultuloy iti panangbalakad kadagiti residente kadagiti naapektaran a lugar a suroten dagiti abiso dagiti lokal nga otoridad dagitoy ken agridam iti posible a panagibakwit no kasapulan.
