LAOAG CITY – Naawaten dagiti 28 nga asosasion ditoy siudad ti Laoag ti incentives grant-da manipud iti Department of Social Welfare and Development a naisayangkat iti Barangay 25 ditoy siudad.
Dagitoy dagiti benepisario ti Sustainable Livelihood Program (SLP) babaen ti panangipagna ti opisina ni House Majority Leader ken 1st District Congressman Sandro Marcos tapno makatulong a pagsapulan dagiti umili iti siudad.
Nagdumaduma ti negosio kas ti water refilling, retail store, micro-enterprise nga imanmanehar dagiti asosasion ti naipaayan ti pundo nga usarenda tapno mapadakkel.
Ma-monitor a naimbag ti pannakausarna gapu ta ti kangrunaan a gagem ti proyekto ket matulungan ti pagsapulan dagiti asosasion.
Umab-abot ti 6,400,000 pesos ti gatad ti naipaay a pundo a nagbibingayan dagiti 28 nga asosasion.
Nagatendar ti aktibidad da Laoag Liga ng Barangay President Rbee Ablan ken Mr. Edwin Cariño, agpada a Consultant iti opisina ni Cong. Marcos, dagiti opisial ti Department of Social Welfare and Development iti Ilocos Norte, Ms. Joan Pasigui ti City Social Welfare and Development ditoy siudad ti Laoag a nangibagi ken ni Mayor James Bryan Alcid.
Nagyaman ti gobierno siudad iti Department of Social Welfare and Development ken ni Congressman Marcos iti suporta ken tulongda iti panagrang-ay ti biag dagiti Laoagueño.
