LAOAG CITY – Insingasing ni Committee on Basic Education Chairman Bam Aquino a mangdutok ti nayon a manpower kadagiti pagadalan nga ag-monitor kadagiti nakaimuntar a Close Circuit Television wenno CCTV camera.
Daytoy ket kalpasan a naammoan iti joint hearing ti Basic Education ken Higher, Technical and Vocational Education Committee a walo laeng ti CCTV iti uneg ti San Jose National High School idiay Tacloban City idi napasamak ti mass school shooting a nakatayan ti tallo nga estudiante.
Iti agdama, nangikabil ti nayon a CCTVs ken walk-through metal detectors iti nasao a pagadalan para iti panagsubli ti klase kalpasan ti napasamak nga insidente.
Nupay kasta, kuna ni Aquino, malaksid iti panangikabil kadagiti nayon a CCTVs kadagiti pagadalan ket nasken nga addaan daytoy ti manpower kas ti security officer nga agbantay ken agbuya iti mapaspasamak.
Inlawlawagna a no adda laeng ti mangisusuro wenno security personnel a nakabantay iti CCTV iti San Jose National High School ket mabalin nga insigida a nakapan iti lugar nga ayan ti shooter ken nalappedan ti pammaltog.
Kabayatanna, inpetteng ni Education Undersecretary Malcolm Garma nga awan ti security officers dagiti pagadalan no diket security guards laeng a masansan nga i-outsource pay.
