LAOAG CITY – Inrubuat ti administrasion ni United States President Donald Trump ti kampania tapno ad-adda pay nga isina ti International Criminal Court (ICC) kagiddan ti panangipettengna a saanna daytoy a bigbigbigen ti bileg ti korte nga imbestigaran wenno mangusig kadagiti umili ken opisial ti Estados Unidos.
Inbatad ni United States Secretary of State Marco Rubio a mangilunglungalong ti administrasion ti nagduduma nga addang kontra iti International Criminal Court pakairamanan ti travel bans, visa revocations, nayon a sanctions kontra kadagiti opisial ti korte ken diplomasia pakairamanan ti panangallukoy iti dadduma a pagilian nga agsanud iti panagbalin a miembro ti International Criminal Court.
Inpetteng ni Rubio a saan nga ipalubos ti Estados Unidos a mausar ti International Criminal Court kontra kadagiti suldado nga Amerikano ken dadduma pay nga opisial ti gobierno.
Kabayatanna, nagkedked met a mangipaay ti komento ti International Criminal Court mainaig iti addang ti administrasion Trump.
Maipalagip a nabayagen a konkontraen ti Estados Unidos ti hurisdiksion ti International Criminal Court ken saan daytoy a nagbalin a miembro ti nasao nga international court.
