LAOAG CITY – Nakitaripnong ni Presidente Ferdinand Marcos Jr. kadagiti Singapore-based companies executives a nangikari a palawaen ti investment-da iti Pilipinas iti sektor iti salun-at ken digital technology.
Ti nadakamat a taripnong ket karaman iti tallo nga aldaw a working visit ni Presidente idiay Singapore.
Kabayatanna, naisayangkat pay ti taripnong ti Presidente iti ehekutibo ti Singapore-based private equity firm ABC Impact ken local conglomerate Ayala Group ken dagiti nangibagi ti Temasek Trust, ti philanthropy arm ti Singapore state-owned global investment firm Temasek tapno pagsaritaan dagiti inisiatibo a mangpalawa iti access iti dekalidad a panangaywan iti salun-at kadagiti Pilipino.
Basar iti Presidential Communications Office (PCO) a pinatibker ti ABC Impact ti commitment a suportaran ti agtultuloy a panangpalawa ti AC Health insaruno daytoy ti investmentna iti Ayala Healthcare Holding Inc. (AC Health).
Idi Agosto 2025, ti ABC Impact a karaman ti Temasek Group iti babaen ti Temasek Trust Asset Management ket nag-subscribe iti 121.9 million common shares ken 208.28 million redeemable preferred shares ti AC Health a nangipaay daytoy ti 16 a posiento minority stake iti Ayala subsidiary.
Daytoy ti first venture ti ABC Impact iti Pilipinas kalpasan ti health-care investments-na iti India, China ken Vietnam.
Kangrunaan a sinuportaranna daytoy ti panangpalawa ti network dagiti ospital, multi-specialty clinics ken retail pharmacies.
Naammoan nga inton tawen 2027, plano ti AC Health a maaddaan ti 10 nga ospital, 300 a klinika ken 1,150 a pharmacy iti portfolio-na, pakairamanan ditoy ti Healthway Medical Network, Generika Drugstore, IE Medica, MedEthix ken St. Joseph Drug.
Kabayatanna, nakitaripnong pay ti Presidente kadagiti ehekutibo ti Singaporean telecommunications conglomerate Singtel Group tapno talantanen ti inisyatibo a mangpalawa iti investment iti digital economy ti pagilian.
Basar iti Presidential Communications Office (PCO), inpaganeget ti taripnong ti agtultuloy a kumpiansa ti Singtel iti Philippine market babaen ti ‘long standing partnership’-na daytoy iti Globe Telecom ken agdurdur-as nga NCS Philippines, maysa a joint venture iti nagbaetan ti NCS ken Yondu ti Globe.
Ad-adda a pinatibker ti Singtel ti commitment-na daytoy a palawaen ti investments ken operasion iti pagilian kabayatan ti agtultuloy a development ti ST Telemedia Global Data Centres (STT GDC) iti Quezon City ken Cavite ket papigsaen iti digital infrastructure ti Pilipinas ken papigsaen ti posision kas maysa a dumurdur-as a regional data hub.
