LAOAG CITY – Umanamong ni dati nga Iloilio 5th District Representative Niel “Junjun” Tupas iti nagbalin nga addang ti House Prosecution Panel a saanna nga ipasango dagiti nabati a testigoda para iti Article 4 wenno Grave Threats iti impeachment trial ni Vice President Sara Duterte.
Segun kenkuana, umno ti nagbalin a desision ti prosekusion no sadinno ti Article IV ti kakapsutan a paset ti Articles of Impeachment.
Inbatadna a no agtultuloy pay ti pannakaipresentar dagiti testigo para iti nadakamat nga artikulo, mabalin daytoy nga agbalin a pakabenepisiaran ti depensa ken mangted ti gundaway a kwestionaren ti kaso.
Kunana a posible nga ikonkonsiderar ti prosekusion panel ti panawagan ti nagduduma nga opisial a saanen nga ituloy ti presentasion iti sabali pay a testigo iti Article 4.
Kabayatanna, inrakurakna a saanen a kasapulan ni National Bureau of Investigation (NBI) Director Melvin Matibag nga agatendar iti panagdengngeg inton Hulio 20 gapu iti rason a naidasaren ti dua a testigo manipud iti National Bureau of Investigation (NBI) ti nagbalin nga imbestigasion ti ahensia mainaig iti maipagarup a grave threats ni Vice President Sara Duterte kontra ken Presidente Ferdinand Marcos Jr., First Lady Liza-Araneta Marcos ken ni dati nga House Speaker Martin Romualdez.
Maipalagip a nagserbi ni Tupas kas lead prosecutor idi 2012 impeachment trial ni dati a Chief Justice Renato Corona.
