LAOAG CITY – Sinungbatan ni Palace Press Officer Claire Castro ti rakurak ni Senador Alan Peter Cayetano a saan nga inaprubaran ni Presidente Ferdinand Marcos Jr. ti rakurak a P10,000 a tulong pinansial.
Inbatad ni Castro a mangipila ti Malacañang ti ebidensia tapno kontraen ti alegasion ni Cayetano. Daytoy ket kalpasan ti rakurak ti senador iti maysa a Facebook Live no sadinno ket inpettengna a sinuppiat ni Presidente Marcos ti nagbalin a rakurakna a mangted ti tulong pinansial kadagiti pamilya a naapektaran ti COVID-19 pandemic.
Innayon pay ni Castro a maipagarup agtultuloy ti panangiwarwaras ni Cayetano kadagiti saan nga umno a damag a segun kenkuana, nga imbes nga admitirenna ti nagkuranganna ket mangitudo pay daytoy ti sabali tapno maisalbarna ti bukodna a bagi.
Immunan nga inbatad ni Cayetano ti nadakamat a rakurak kalpasan ti panagianunsio ti gobierno ti baro a set ti tulong pinansial nga umabot iti P12,000 para iti sumurok pito a milyon a nakukurapay ken addaan ti nababa a sueldo a Pilipino a naapektaran ti krisis ti langis.
Kabayatanna, maipalagip nga inbatad ni Cayetano iti Facebook Live-na iti tawen 2021 agingga iti panagserrek ti tawen 2022 nga inpilana ti pannakaiyallokar ti pondo para kadagiti permi a naapektaran ti pandemya ngem segun kenkuana, kalpasan ti pannakangabak ni Presidente Marcos ket naitantan ti nadakamat a rakurak.
