LAOAG CITY – Inpetteng ni Senador Francis “Kiko” Pangilinan a saan laeng a racist ken panaguyaw ti artificial intelligence (AI)-generated video ti state-owned China Daily a mangiladawan kadagiti Pilipino kas sunggo, no di ket paset daytoy ti propaganda ti Beijing tapno pakapuyen ti bisa ti 2016 Arbitral Award a nangpabor iti Pilipinas iti isyu ti West Philippine Sea.
Iti maysa nga interview, inbatad ni Pangilinan a kagiddan ti pananglagip ti maika-10 nga anibersaryo ti arbitral ruling ket ad-adda pay a paigetan ti China ti panagiwaras ti saan nga umiso nga impormasyon tapno kwestyunaren ti nagbalin a desisyon ti international tribunal.
Kuna na nga agtultuloy ti panagiwaras ti China ti kinaulbud mainaig iti isyu iti West Philippine Sea.
Immunan a kinondenar ni Pangilinan ti nasao nga AI-generated video ken kiniddaw na iti Beijing nga ikkaten da a dagus, agpadespensar iti publiko ken pagsungbaten dagiti adda iti likudan daytoy.
Iti nasao a video, makita ti maysa a sunggo a nakasuot ti ng Barong Tagalog nga agkankanta iti videoke idinto a maipagarop nga agbasbasa ti script manipod iti Estados Unidos ken Japan.
Naipakita pay ditoy ti karakter a mabombomba ti water cannon, a kuna ni Pangilinan a nalawag a mangdakdakamat iti namin-adon a daras a panagusar ti China Coast Guard ti water cannon kontra kadagiti barko ken mangngalap a Pilipino iti West Philippine Sea.
Inpetteng pay ni Pangilinan ti kinapateg ti pannakapapigsa ti suporta ti international community iti arbitral ruling, ken iyarig ti China iti maysa a bully a kasapulan a sangwen iti babae ti natibker nga alyansa iti sabali a pagilian.
