LAOAG CITY – Naalarma ni School Parent-Teacher Association (SPTA) President Bismark Angelo Quidang mainaig ti napasamak a plano a mass shooting ti tallo a menor de edad iti siudad ti Batac.

Segun ken ni Quidang, mabalin a daytoy ket gapu iti dakkel a negatibo nga epekto ti social media, dagiti ay-ayam, ken mabuybuya a mabalin a tuladen dagiti menor de edad, kangrunaan kadagiti biktima ti bullying a kalikagumna ti agibales.

Inbatad na nga insigida a nagpaayab daytoy ti panagtaripnong tapno ag-plano ti sumagmamano nga addang a maipatungpal kadagiti pagadalan.

Pakairamanan kadagitoy ti kanayonan a seguridad, panagnayon ti security guards ken pannakaikabil ti metal wenno walk-through detectors tapno malappedan ti pannakaiserrek kadagiti deadly weapons.

Kunana a nasken pay ti naan-anay a panang-monitor dagiti nagannak tapno maipaayan ti pammagbaga ken umdas nga atension dagiti ubbing.

Mainaig iti daytoy, kunana a maysa pay kadagiti addang nga aramiden da ket ti pannagkiddaw ti tulong kadagiti psychology teachers ken sociology teachers manipod ti Mariano Marcos State University-Batac Campus tapno mangiwanwan kagiti agtutubo.

Innayonna a nasken a maawatan dagiti nagannak a dakkel ti diperensia iti panawen ita ken idi gapu ta adda epekto dagiti makitkita dagiti agtutubo a mabalin da a tuladen.

Kabayatanna, kumpiansa ni Quidang nga ado dagiti nakasagana a tumulong kadakuada tapno maipasigurado ti kinatalged dagiti agad-adal.