Nangisayangkat ti tignay-protesta ti grupo dagiti agtutubo a Bayan Ilocos Norte ken Saluadan group, maysa nga environmental group iti ciudad ti Batac ita nga aldaw Nobiembre 16, 2026
Sakbay ti tignay protesta ket nangiyuswat nga immuna dagiti nasao a grupo ti Misa iti Iglesia Filipina Independente.

Apaman a nalpas ti misa ket rinugyan a dagus dagiti protesters ti nagmartsa.

Segun ken ni Fr. Arvin Mangrubang, gagem ti panangiyuswat da ti tignay-protesta ket tapno kontraenda ti pannakaipatakder ti pax silica wenno AI-hub iti Pilipinas.

Mamati ni Mangrubang a ti nasao a pasdek ket awan ti napintas nga ipaay na kadagiti pilipino no di ket para iti pasayaatan ti Estados Unidos gapu ta agpaay kas hub da para iti panagsagsagana da iti pannaki-kompitensia da iti China.

Nagleppas ti nasao nga aktibidad babaen iti maysa a solidarity message ti maysa a kadagiti miembro ti Bayan Ilocos Norte tapno ipannawagan da ti importansia ti panangprotehir ti aglawlaw, karbengan dagiti Pilipino, ken nailian a soberanya.