LAOAG CITY – Natay ti kinalubbon ti nakamotorsiklo kalpasan a nadisgrasia iti Barangay 6, San Pedro I iti ili ti Bacarra.
Nabigbig ti driver ti motorsiklo a Yamaha NMAX a ni Kevin Mendoza Galiza, agtawen ti 32, awanan asawa ken ti kinalubbonna ket ni Joshua Claro Galiza, adda iti umno a tawen, awanan asawa nga agpada dagitoy a residente ti Barangay 22, Bani iti ili ti Bacarra.
Basar iti Bacarra Municipal Police Station, kabayatan a dumaldalyasat ti nakamotorsiklo nga agturong nga agpalaud iti paset ti Roxas Boulevard iti Barangay 6, San Pedro I iti nasao nga ili ket idi nakadanon iti kurbaan a kalsada ket maipagarup a saan a napakadaan ti driver isut gapuna a nagdirdiretso agingga a natnag iti karayan.
Gapu iti daytoy, agpada a naipurwak ti driver ti motorsiklo ken ti kinalubbonna a nagsagabada ti sugat iti nagduduma a paset ti bagida.
Naitaray dagiti biktima iti kaasitgan a medical facility para iti naan-anay a pannakatamingda ngem naideklarar a dead on arrival ti kinalubbon ti nakamotorsiklo gapu iti nakana a sugat iti ulona idinto a manarimaan a maag-agasan ti driver ti motorsiklo.
Kabayatanna, naammoan a maipagarup nga adda iti impluwensia ti nasanger dagiti biktima idi napasamak ti insidente.
