LAOAG CITY – Inpasigurado ni Dr. Melvin Manuel, mangidadaulo ti City Disaster Risk Reduction and Management Office ditoy siudad ti Laoag a naka-preposition dagiti rescue equipment kagiddan ti iduduprak ti Tropical Storm Kiyapo.
Segun kenkuana, nakasagana ti opisinada iti aniaman a pasamak wenno kalamidad babaen iti pannakitinnulong dagiti nagduduma a lokal ken nasional nga ahensia.
Inbatadna a nakasagana payen dagiti evacuation center no inkaso man nga adda dagiti agkasapulan a maibakwit a residente.
Inlawlawagna a naballaagan metten dagiti mangngalap a saan pay laeng a tumaptapog gapu iti dadakkel a dalluyon iti kabaybayan ken dagiti amin a residente ditoy siudad ti Laoag.
Inpasingkedna nga alisto ti panagresponde dagitoy kadagiti agkasapulan ti tulong ita a panawen ti panagtutudo.
