LAOAG CITY – Impakaammo ni Ms. Perlito Cabello ti mangidadaulo iti City Social Welfare and Development Office (CSWDO) ditoy siudad ti Laoag a nangrugin ti pannakaipaay ti tulong para kadagiti naapektaran ti Bagyong Kiyapo.
Kunana nga umabot ti pakabuklan a 108 a pamilia wenno 371 nga indibidual manipud iti 22 a barangay ti naireport a naapektaran.
Mainaig iti daytoy, naipaayan dagiti nag-evacuate iti evacuation centers ti family food packs a naglaon ti 5 a kilos a bagas, sardinas, corned beef wenno meatloaf, kape, noodles, ken sotanghon.
Naipaayan met ti relief kits dagiti pamilia a nadadael ti pagtaenganna tapno makatulong iti panagbangonda.
Innayonna a malaksid iti relief assistance, agtultuloy ti panangiproseso ti nasao nga ahensia tapno maipaayan ti pinansial nga ayuda dagiti pamilia a nadadael ti pagtaenganda.
Kabayatanna, dagitoy ket segun iti umuna nga assessment ket adda ti uppat a partially damaged ken tallo a nadadael a pagtaengan, ken ti maysa a a nasugatan manipud Barangay Casili ken Barangay Pila.
