LAOAG CITY – Inbatad ni Ms.Lovely Joy Garcia, Counseling Professional ti Speak Up, I’m Here Mental Health Hotline and Center ti Ilocos Norte Youth Development Office (INYDO), a maysa kadagiti aktibidad nga isaysayangkat ti opisinada ket ti panangipatungpal iti Yoga and Meditation Session para kadagiti umili.

Daytoy nga aktibidad ket naisagana tapno mangipaay ti gundaway kadagiti makipaset a makainana ken makapagpokus iti bukodda a bagi babaen iti yoga ken meditation.

Mainaig iti daytoy, maisaysayangakat ti yoga and meditation session iti Marcos Stadium.

Daytoy ket mangtulong iti relaxation, self-awareness, ken emotional well-being, no sadinno dagiti umuna a 50 a partisipante iti daytoy a programa ket naipaayan ti libre a yoga mat.

Segun ken ni Garcia, maisaysayangkat daytoy a programa iti tunggal quarter iti daytoy a tawen.

Babaen iti daytoy, kalikagum ti Speak Up, I’m Here a mangipakita iti kinapateg ti panangipaay iti oras para iti mental wellness.

Kabayatnna, itultuloy met ti programa ti panangipakaammo ti natalged a lugar a pakapadasan dagiti tattao a makasapul iti tulong tapno mapagtalinaedda ti salun-atda.