LAOAG CITY – Nakastreken ti quarterfinals ti Mubadala DC Open ti Filipina tennis star a ni Alex Eala kalpasan nga inabakna ti defending champion a ni Leylah Fernandez ti Canada, 6-2, 7-6 (7-1).
Daytoy ket kalpasan a limmamang ti umuna a set, nakasubbot ni Eala manipud iti 1-5 deficit iti second set sakbay a naan-anay a maipangabak ti ay-ayam iti uneg ti maysa nga oras ken 53 a minuto.
Inbatad ni Eala a nagbalin a narigat ti laban gapu ta nalaing ti kalabanna a ni Fernandez ngem inpannakkelna ti panagbalinna a kalmado iti ay-ayam.
Kunana a ti tulbek ti panagballigina ti panagbalinna a naanus iti panagbirok ti wagas tapno makasubbot uray umadayo ti gidyat daytoy iti katengngaan ti laban.
Maipalagip nga immuna nga inabak ni Eala iti umuna a round ti Paris Olympic gold medalist a ni Zheng Qinwen ti China iti maysa a tallo a set a laban.
Iti quarterfinals, sangoen ni Eala ti mangabak iti nagbaetan ti second seed a ni Elina Svitolina ti Ukraine ken qualifier a ni Polina Kudermetova ti Russia.
