LAOAG CITY – Sinentensiaan ti korte ti 15 a tawen a pannakaibalud ti ama ti maysa nga agtutubo a responsable iti mass shooting iti maysa nga agtutubo nga high school idiay Georgia, U.S.A idi 2024 a nakatayan ti uppat nga indibidual.
Ni Colin Gray, agtawen ti 55 ket napatawan kas guilty kalpasan a napaneknekan a nagkurang daytoy ken intedna iti anakna a ni Colt Gray ti paltog nga inusar iti insidente.
Immunan a nasentensiaan ni Colt Gray nga ita ket agtawen ti 16 ti tungpal biag a pannakaibalud nga awan ti posibilidad a maipaayan ti parole gapu iti panagpaltog iti pagadalan.
Inbatad ni Judge Nicholas Primm a nupay mapakawan ti sakit nga intunda ti insidente kadagiti biktima ken ti pamiliada ket kasapulan latta nga isina ti panagsungbat ti ama iti mismo a krimen nga inaramid ti anakna.
Naammoan a maibilang daytoy a kaunaan idiay Georgia a pinatawan ti second-degree murder ti maysa a nagannak gapu iti mass shooting nga inaramid ti anakna.
Basar kadagiti prosecutor, adda ti pagilasinan nga adda ti maipagarup a kinaranggas a talugading ti anak sakbay pay ti pammaltog ngem saan daytoy a naikkan ti umdas a tignay ti nagannak kenkuana.
Agtultuloy nga us-usaren dagiti prosecutor idiay Estados Unidos ti kastoy a legal nga addang tapno pagsungbaten dagiti nagannak a mapaneknekan a nagbaybay-a iti panagpadakkel kadagiti annakda nangruna iti panagusar kadagiti paltog kas paset ti panangsolbar iti kumarkaro nga school shooting incident iti pagilian.
