LAOAG CITY – Nareliboanen ti kameng ti Philippine National Police (PNP) iti ili ti Bacarra gapu iti maipagarup a saan a nainkalintegan nga aramid iti panagresponde iti maysa a pagtaengan ken ti panagpangtana iti biag ti sumagmamano a residente.
Segun ken ni PMajor Tolentino Erum, Hepe ti Bacarra Police Station, addan iti Ilocos Norte Police Provincial Office (INPPO) ti nasao nga pulis kabayatan iti imbestigasyon da.
Immuna iti daytoy, inreklamo ni Father Arvin Mangrubang iti ili ti Bacarra ti nasao a pulis kalpasan ti maipagarop saan a nasayaat a panagresponde da iti balay da gapu iti panagbi-videoke da gapu ta adda ti pasken da.
Inadmitir na a naladaw nga insardeng ti panagvideoke da isut gapuna a nagpadispensar da kadagiti nagresponde a pulis ken nagkiddaw a palpasenda laengen ti maysa a kanta ngem ditoy metten a maipagarup a nangrugi ni Patrolman Vea a nagprobokar ken nagpangta.
Inpeksa ni Mangrubang ti sakit ti nakemna iti nasao a pulis gapu ta imbes nga isuda ti pagwadan ti linak, urnos ken talna ngem dagitoy met ti agaramid ti riribok.
Inlawlawagna a masapul nga ipatungpal dagiti kameng ti kapulisan ti proper protocol no sadinno nga agkatokda kadagiti pagtaengan tapno saanda nga agaserserrek, respetaren dagiti umili ken makikoordinar da iti barangay tanod wenno kagawad iti panagrespondeda.
Mainaig iti daytoy, inbatad ni Erum a saanna a kanunungan ti maipagarup a saan a nainkalintegan nga inaramid ti nasao a pulis iti baet ti naiget a panangipatpatungpal da iti curfew ti nasao nga ili.
Nupay kasta, inpetteng ni Erum a rumbeng koma met a respetaren dagiti maseknan a residente dagiti otoridad ken ti linteg.
Kabayatanna, kuna ni Erum a nagturong metten ti National Police Commission (NAPOLCOM) iti Philippine National Police iti ili ti Bacarra tapno mangiwayat ti bukod nga imbestigasyon seknan iti napasamak.
Iti statement, kinomendaran ni Commissioner Rafael Vicente R. Calinisan ti nagbalin a tignay ti National Police Commission Regional Office I iti babaen ti liderato ni Regional Director George Aplas D. Daskeo para iti dagus a pannakarelibo ken reassignment ti maak-akusaran a pulis bayat ti pannakaisagsagana ken pannakaiproseso ti kaso administratibo.
Inpetteng pay ni Calinisan a no mapaneknekan nga adda ti nalabsing ti nasao a pulis ket saan nga agpangadua ti National Police Commission a mangipataw ti maiyannatop a kaso kontra kenkuana.
