LAOAG CITY – Naaprobaran iti komite ti panag-reclassify iti dadduma a talon ditoy siudad ti Laoag manipud iti agricultural a panagusar iti residential ken commercial.
Segun ken ni Sangguniang Panlungsod Member Conrado Respicio, naaprobaran daytoy iti naudi a sesion ti konseho ngem napabassit ti sakupna manipud iti umuna a 28 nga ektaria agingga iti 18 nga ektaria gapu ta naikkat dagiti lugar nga adda ti pannakakontestar iti pannakabalin ti daga.
Sakup ti proyekto dagiti daga manipud iti Migrant Workers Rotonda agingga iti Paoay ken manipud iti Lagui-Sail agingga iti Laoag ken Vintar.
Maipalawa met ti kauneg ti reclassification manipud iti 100 metro agingga iti 200 metro manipud iti tengnga ti kalsada iti agpadpada iti dua a paset ti kalsada.
Nupay kasta, inbatad ni Konsehal Respicio a saan a maisakup dagiti daga nga adda iti sakup dagiti irrigation system wenno canal ken saan met a lumablabes iti 10 a porsiento ti amin a talon iti siudad.
Masapul a maipatuloy ti dalan wenno pagnaan dagiti mannalon tapno maaddaanda latta iti paglasatan ken pagipanan kadagiti ramitda iti uneg dagiti talonda.
Naammoan nga awan ti nairekord a panangkontra iti plano a reclassification malaksid iti naipakaammo a pakaseknan iti Lagui-Sail a naipasimudaag a naisakup met iti exemption a naited babaen iti linteg.
Kabayatanna, mangnamnama ni Konsehal Respicio a maidatag ti committee report para iti maikadua ken maudi a pannakaibasana iti sumaruno a sesion iti Sangguniang Panlungsod ditoy siudad ti Laoag.
