LAOAG CITY – Nag-viral online iti maysa a humanoid robot head a nainaganan nga Origin M1 kalpasan nangipakita daytoy ti nakalalaing ken arig maysa a tao ti panaggunay ti rupana no sadinno napagsaritaan dagiti netizens.
Ti Origin M1 ket naaramid ti Chinese robotics startup nga AheadForm a naipasdek idi tawen 2024 ni Yuhang Hu, maysa nga engineer nga agbasbasa iti Creative Machines Lab iti Columbia University iti New York.
Gagem ti kompania nga aramiden a natural ti pannakakoordinar ti tao ken robot iti babaen dagiti robot nga addaan ti ad-adda a realistic nga facial expression.
Ti nasao a robot ket kayana a tuladen ti agduduma a facial expression kas ti panagkidem, panagissem ken panagkuti ti mata.
Mainaig iti daytoy, iti uneg ti silicon a kudil ti robot ket addaan ti 25 agingga 42 a babassit a brushless motor a nagserbi kas “artificial muscles” tapno kontrolen dagiti ekpresionna daytoy. Addaan pay ti camera iti matana nga us-usaren tapno makakita iti aglawlaw ken microphones ken speakers tapno makangngeg ken makasao.
Gapu iti advanced technology, umabot iti sumurok-kumurang $150,000 ti balor ti most advanced version ti nasao a robot.
Agtultuloy ti panag-develop ti AheadForm tapno mapaimbag pay ti panaggunay ti bibig ken panagsao daytoy no sadinno gandatda iti makikonektar iti dadakkel a language models wenno Artificial Intelligence (AI) systems.
