LAOAG CITY – Temporario a naapektaran ti panangdengngeg ti maysa nga agtawen ti 18 a lalaki iti China kalpasan a daytoy na-expose iti mano nga oras iti uni ti cicada, maysa nga insekto kabayatan ti camping-na iti kabakiran iti Ningbo Zhejiang province.
Iti kabakiran, naripar ti lalaki nga agnagan ti Wang a kumarkaro ti pigsa nga uni ti adu a cicada.
Nagtalinaed daytoy manipud iti aldaw agingga rabii ket ditoy a nariknana ti panagsulpeng ti lapayagna.
Iti butengna, insigida a napan ti ospital ket ditoy a naduktalan nga adda ti lumlumteg iti paset ti lapayagna nga adda ti pakainaigan ti panagdengngeg.
Naipaayan daytoy ti agas tapno makissayan ti panagletteg ken inabisoan ti doktor a liklikanna ti nariringgor iti uneg ti saan a nababbaba ngem 14 nga aldaw.
Naammoan a kalpasan ti dua a lawas, nagsubli ti panagdengngegna.
Segun ken ni Dr. Li Ji, senior doctor iti Ear, Nose and Throat department ti Ningbo University a dakes a panunuten nga agnanayon a natalged iti panangdengngeg dagiti ringgor nga aggapu iti aglawlaw.
Ti ringgor ti maysa a cicada ket saan nga aglabes iti 70 decibels ngem ti ringgor ket aggapu iti adu a cicada ket mabalin nga agresulta iti sumurok 85 decibels, lebel a mabalin a makadadael iti panagdengngeg.
