LAOAG CITY – Inpetteng ni Presidente Ferdinand Marcos Jr. a nasken a saan nga awagan nga “ill-gotten wealth” ti sumagmamano a sanikua ti pamilia Marcos.
Segun iti Presidente, napaneknekan kadagiti civil case a napangabakan ti pamiliada a saan nga ill-gotten wealth dagiti sanikua a karaman.
Inlawlawagna a saan a mabalin a basta dakamaten kas ill-gotten wealth dagiti sanikua no adda dagiti desision ti korte a mangipaneknek a saan daytoy a kastoy a klase ti baknang.
Kabayatanna, kuna ni Marcos a saan daytoy unay a nakatutok kadagiti legal a pagsasaritaan maipanggep iti family wealth ken inpaimanan dagitoy kadagiti abogadona.
Karaman kadagiti nadakamat ti Arelma assets nga adda ti pakainaiganna iti mapatta-patta a dua a milyon dolyar nga asset a maipagarup nga inkabil iti shell company idiay Panama.
Inpaganetget ti Presidente a saan daytoy a karaman iti nasao a legal proceeding ken saannan nga ammo ti agdama nga estado daytoy.
