LAOAG CITY –Inbatad ni Presidential Communications Office (PCO) Undersecretary ken Palace Press Officer Claire Castro ken ni Vice President Sara Duterte nga awan ti nangatngato ngem iti linteg kalpasan a kiniddaw ti legal team-na iti korte ti Quezon City a denggen ti oral arguments-na para iti mosionna a mangwaswas iti kaso a grave threats a naipila kontra kenkuana.
Kinuna ni Atty. Paul Lawrence Lim, abogado ni VP Sara, nga inpila ti depensa ti manifestation tapno maipaayan ti importansia dagiti oral arguments gapu iti maipagarup a nalawa nga epekto dagiti kaso.
Segun ken ni Lim, mabalin nga adda implikasionda daytoy kadagiti dadduma a sitting officials a mabalin a mai-impeach.
Kinunana a no mabalin a maikaso ken mausig ti nakatugaw a bise presidente, mabalin met a maidarum dagiti dadduma nga impeachable officials kas iti Ombudsman, miembro ti Constitutional Commissions, hues ti Korte Suprema, ken uray ti Presidente.
Iti sabali a bangir, binabalaw ni Castro ti kampo ni VP Sara,nga inladawanna kas sabali pay a pangta kontra ken ni Presidente Marcos.
Nagpannawagan pay ni Castro ken ni VP Sara ken ti legal team-na a pagpatinggaendan ti “infamous culture for which they are known.”
Impanagetget ni Castro a ti sitting elected official ket mabalin latta a ‘subject to impeachment’ no adda umdas a rason.
