LAOAG CITY – Kinumpirmaran ni Gilas Pilipinas head coach Tim Cone a dandanin ti panagretiro ni June Mar Fajardo.
Inbatad ni Cone a ti maudi a panagay-ayam ni Fajardo ket iti fourth window ti FIBA World Cup 2027 Asian qualifiers.
Gapu iti daytoy, saan pay a sigurado ni Cone no makaay-ayam ti agtawen ti 36 a ni Fajardo para iti mapaspasangasangan a 20th Asian Games iti Nagoya, Japan.
Innayon ni Cone nga idi pay a kayat ni Fajardo ti agretiro ngem inraman da paylaeng daytoy iti fourth window.
Kuna na a napateg a makadwa da ti 6-foot-11 a beterano ken nine-time PBA Most Valuable Player.
Ti panagretiro ni Fajardo maipatungpal agarop maysa a tawen kalpasan a nagretiro iti Gilas Pilipinas ni Japeth Aguilar.
Ni Aguilar ket nagay-ayam iti national team iti uneg ti 16 a tawen.
Naikeddeng a makasango ti Gilas Pilipinas ti Jordan intono Agosto 28 ken ti sumaruno a makasango da ket ti Iran intono Agosto 30 nga agpada a maiyuswat iti Mall of Asia Arena.
