LAOAG CITY – Plano ti aktres a ni Bianca Umali nga ituloy ti panagadal na ken magagaran unayen daytoy.
Iti podcast, inburay ni Bianca a pinili na nga unaen paylaeng ti panagadal ti kasinsin na a ni Samantha imbes a ti bukodna a bagi.
Nupay kasta, kuna na nga iti panagturposen ni Samantha ket isu metten ti gundaway na tapno maituloy ti panageskwela na.
Inlawlawag ni Bianca a nagboluntaryo nga isuna ti mangpabasa iti kasinsin na kas panagyaman na iti lola da.
Dimmakkel ti aktres iti Lola Vicky na kalpasan a naulila iti ina idi agtawen paylaeng ti lima idinto a pimmusay met ti ama na idi agtawen ti 10.
Mamati met ni Bianca a kaanuman ket saan nga agbalin a naladaw para iti siasinno man ti panagadal.
Inpakaammo na a dua ti pagpilpilyan na, ti mapan iti desigh school para iti interior design wenno agenrol iti dakdakkel nga unibersidad.
Maipalagip a nagturpos ti aktres iti senior high school idi 2019.
