LAOAG CITY – Naiyalud-od ti naikeddeng a nationwide simultaneous active shooter wenno active-threat drill iti public ken private school iti intero a pagilian inton bigat, Agosto 25, basar iti kumpirmasrion manipud ken ni Department of Education (DepEd) Secretary Sonny Angara.
Manamnama a mangiparuk-at ti official announcement ken pakabuklan a detalye mainaig iti rason ti pannakayalud-od ken sumaruno nga schedule ti panagsanay.
Maipalagip nga inanunsyu ti Department of Education ti nationwide simultaneous drill no sadinno inlawlawag ni Department of Education Undersecretary Malcolm Garma a gagemna daytoy a padasen ti kinasagana, panagbakwit, ken ti proseso ti ‘reunification’ dagiti estudiante ken dagiti nagannakda no man adda mapasamak a pangta wenno kinaranggas iti uneg dagiti pagadalan.
Inaramid dagiti safety protocol kabinnulig ti Philippine National Police (PNP) ken ti Department of the Interior and Local Government (DILG) kabayatan dagiti kallabes nga insidente ti pammaltog ken kinaranggas kadagiti pagadalan, partikular iti Tacloban City ken Zamboanga City.
Immunan a naisayangkat ti pilot simulation dagiti ahensia iti nagduduma a pagadalan idi Hulio tapno maurnos dagiti pagalagadan sakbay ti napalawa nga implementasion.
Kabayatan ti pannakayalud-od ti naikeddeng a napalawa a drill, agtultuloy ti panangbalakad kadagiti mangidadaulo ti pagadalan nga agtalinaed a naiget ti seguridad kadagiti pasilidad, mangipatungpal ti naurnos a panangbantay ken siguradoen nga adda umdas a panag-annad tapno saan a mangitunda ti buteng ken trauma kadagiti agtutubo ti aniaman nga insidente nga arig ti panagsanay a sangoen.
Kabayatanna, kinontra ti grupo dagiti psychologist ti nadakamat a drill gapu ta ma-highlight ti maysa a sensitibo nga insidente a mabalin a mangitunda ti saan a napintas nga epekto iti pakabuklan.
