LAOAG CITY – Umaboten iti P1.91 billion ti gatad ti pannakadadael ken pannakalugi ti sektor ti agrikultura gapu iti napigsa a southwest monsoon wenno habagat ken dagiti naglabas a bagyo Luis, Maymay ken Neneng, basar iti Department of Agriculture (DA).
Basar iti kaudian nga assessment dagiti regional office, 61,237 a mannalon ti naapektaran kabayatan a sumurok 54,611 nga ektaria ti agricultural areas ti nadadael.
Mapatta-patta a 7,772 metric tons ti agricultural commodities ti naawanan iti produksion.
Naamoan a ti kadekkelan a nadadael ket iti pagay nga umabot iti P1.07 billion kabayatan nga P610.32 million ti nairekord a losses iti high-value crops.
Pakairamanan kadagiti naapektaran a mula ket dagiti nateng, spices, legumes, prutas kas ti avocado, calamansi, citrus, durian, lanzones, mangosteen, melon, papaya, pineapple, rambutan, strawberry, watermelon, ken saba, mangga, root crops ken ornamental crops.
Adda met iti P92.68 million ti nadadael iti mais kabayatan a P23.62 million losses iti cassava production.
Nupay kasta, umabot iti P16.27 million ti nadadael iti livestock pakairamanan dagiti manok, baboy, baka, nuang, kalding, tupa, pato, rabbit ken dadduma pay a taraken nga ayup.
Nadadael pay dagiti iriigation facilities nga aggatad ti P60.96 million, P16.37 million iti farm structures ken P1.91 million iti machinery ken equipment.
Umabot iti P9.26 million ti nairekord a losses iti fisheries ken aquatic resources.
Kas tulong kadagiti naapektaran a mannalon, inbatad ti Department of Agriculture nga addaan ti P237.99 million ti gatad ti agricultural inputs pakairamanan ti bin-i ti pagay, mais ken nateng ti mabalin nga ibunong.
Malaksid iti daytoy, mabalinda pay a makaala ti pautang agingga P25,000 iti babaen ti Survival and Recovery wenno SURE Loan Program ti Agricultural Credit Policy Council.
Nupay kasta, mangipaay ti National Food Authority ti 3,631 a bags ti milled rice kadagiti naapektaran a local government units iti Ilocos Region, Cagayan Valley, Central Luzon ken MIMAROPA.
Kabayatanna, nag-deploy ti ahensia dagiti KADIWA tricks para iti transportasion ti agricultural commodities ken panangitulod ti tulong kadagiti naapektaran a lugar.
