LAOAG CITY – Inbatad ni Atty. Carlos Isagani Zarate, dati a representative ti Bayan Muna Partylist, a posible a mapabasol dagiti nagpirma iti liquidation pakairamanan da Gina Acosta ken ni Bise Presidente Sara Duterte no mapaneknekan nga adda ti iregularidad iti panagusar a confidential funds.
Mainaig daytoy iti testimonia ni dati a special disbursing officer iti Office of the Vice President Gina Acosta kas hostile witness ti prosekusion.
Maipalagip nga inbatad ni Acosta nga adda acknowledgement receipt ngem kunana nga inbabawi daytoy ni Colonel Raymund Dante Lachica idi panawen ti panang-liquidate iti Commission on Audit, ngem inawagan daytoy ni Atty. Zarate a “very convenient excuse” wenno bogus explanation.
Kunana a saan a mapabasol ni Colonel Lachica gapu ta awan ti aniaman a dokumento wenno papel a mangpaneknek a naawat na dagiti kuarta.
Innayon na a napateg ken rumbeng ti agpapirma no adda ti maipaay a kuarta, iti gobierno man wenno pribado kas pammaneknek a naawat ti siasinoman.
Kabayatanna, inbatad ni Atty. Zarate a no mapaneknakan a nausar ti pondo iti saan nga umno a pakausaran wenno adda ti iregularidad na ket mabalin a sumango da Acosta ken Duterte ti kaso a plunder gapu ta isuda ti nagpasingked kadagiti liquidation.
