LAOAG CITY – Silulukat ni Presidente Ferdinand Marcos Jr. iti posibilidad a naan-anay a pannakaiparit ti Facebook ken sumagmamano nga online games iti pagilian.
Kasaruno daytoy ti rekomendasion ti Cybercrime Investigation and Coordinating Center (CICC) a mangiparit iti Facebook gapu iti panagwaras ti di umiso nga impormasion ken tapno masalakniban dagiti agtutubo manipud iti pannakaabuso.
Segun kenni Palace Press Officer Usec. Claire Castro, silulukat ti presidente a mangikkat iti aniaman a mabalin a mangdangran kadagiti agtutubo.
Nupay kasta, kinuna ni Malacañang a nasken nga umuna nga adalen no talaga a makatulong ti pannakaiparit tapno malappedan dagiti peke a damag ken dadduma pay a peggad a patauden ti social media ken online gaming platforms.
Kinunana pay a napateg a masungbatan dagiti plataporma iti aniaman a pangta iti publiko, nangruna no adda epekto dagitoy kadagiti agtutubo.
Namin-adon a naawis dagiti pannakabagi ti Meta ken Roblox kadagiti panagdengngeg ti Senado tapno ilawlawagda maipapan kadagiti insidente ti kinaranggas iti sumagmamano a pagadalan a mainaig iti pannakausar dagiti platapormada.
