LAOAG CITY – Agtultuloy ti panangisayangkat ti City Health Office (CHO) ditoy siudad ti Laoag iti Measles-Rubella Supplemental Immunization Activity (MRCIA), agraman ti panangalukoy kadagiti nagannak a pabakunaan dagiti annak da.
Segun kenni Dr. Rodrigo Catcatan, mangidadaulo iti City Health Office ditoy ciudad ti Laoag, 45.8 a porsiento paylaeng ti accomplishment ti ahensya manipod iti target a 80 a porsiento.
Kuna na nga umabot iti 8,123 nga ubbing ti target da a mabakunaan ditoy ciudad no sadinno a 3,717 paylaeng ti nabakunaan iti Measles-Rubella Supplemental Immunization Activity.
Inpalagip ni Catcatan a dagiti 6 agingga iti 59 a bolan na nga ubbing ti mabalin a mabakunaan iti nasao nga aktibidad, agraman dagiti saan pay a nabakunaan.
Mainaig iti daytoy, inpakaammo ni Dr. Catcatan nga agpatingga intono Agosto 28 ti aktibidad, ken no adda pay ti panagkurang iti target da a bilang, maaramid ti panag-mop-up tapno madanon dagiti saan pay a nabakunaan nga ubbing.
Kunana a maysa kadagiti karit iti City Health Office ket ti panagkedked ti dadduma a nagannak a mangpabakuna kadagiti annak da gapu iti pammati, pakairamanan dagiti pamilya iti Muslim Compound.
Gapu iti daytoy, agtinnulong ti City Health Office ken Provincial Health Office tapno mailawlawag kadagiti nagannak ti kinapateg ti panagbakuna tapno mailiklik dagiti ubbing manipod iti sakit kamuras ken rubella, ngem no saan latta a maliklikan dagitoy a sakit ket saan unay a nakaro ti epektona kadakuada.
Kabayatanna, innallukoy met ni Dr. Catcatan dagiti nagannak nga addaan iti ubbing nga agtawen iti 6 agingga iti 59 a bulan nga ipanda dagiti annak da iti Barangay Hall no adda panagbakuna tapno maprotektaran dagitoy kontra iti Measles ken Rubella.
